१० जनवरी २०१३
बिन्ति श्रेष्ठ
साउदी अरबको जेजान शहरमा यतिखेर
मजस्तै एउटी नेपाली चेली गंगा बरालले आफ्नो ज्युज्यान बचाउन उद्धार गरिदिन
गुहार मागेकी छिन । एनआरएनए साउदी अरबका अध्यक्षसंग भएको उनको फोन वार्ताको अडियो रेकर्डमा अभिब्यक्त उनको चित्कार सुनेपछि म पनि भाव बिह्वल बनें ।
पहिलो घरमा साउदीको कुटाई खाएपछि
बिरामी भएकी उनी अहिले दोस्रो साउदीको घरमा छिन, साउदी मालिकले उपचार पनि
नगराइदिएको र स्वदेश फर्किन पनि नदिएको कारण उनले रूंदै फोनमा आफ्नो बेदना
पोखेकी छिन ।
नेपालमै आश्यान तामाङ, राजु
बि.क. र जिते चौधरीहरूले गंगालाई १५ हजार साउदी रियालमा बेचेर भारत हुंदै
साउदी पठाएका रहेछन र अहिले साउदी मालिकले स्वदेश फर्किनका लागि त्यही १५
हजार रियाल फिर्ता दिन भनेका छन र गंगालाई शुरूदेखि नै कुनै पनि तलब दिएका
पनि छैनन ।
एनआरएनए साउदी अरबले गंगाको यो
अवस्थाको जानकारी गराउंदै उनको उद्धार गरिदिन नेपाली राजदूतावासमा पत्राचार
गर्यो । गतः २८ डिसेम्बरमा दमाममाआयोजित एनआरएनएकै एक कार्यक्रममा राजदूत
स्वयमले गंगाको प्रसंग निकाल्दै उनको उद्धार गर्न करीब रू. २ लाख जति खर्च
हुने भएता पनि दूतावास तयार रहेको तर उनको घर ठेगाना स्पष्ट (यकिन)
हुनुपर्यो भन्नुभएकोमा हाल गंगाले आंफू जेजानको गुम्फिजा टोलको मूल सडकबाट
केही भित्रको २ वटा प्रवेश द्वार (ठूलो र सानो) भएको 022 नम्बरको ३ तले
घरमा आंफू रहेको र घर अगाडी २ वटा फलामका खम्बा रहेको भन्दै घर ठेगाना पनि
दिइसकेकी छिन । जेजान रियाद/दमामबाट करीब २ हजार कि.मी.को दूरीमा यमनको सिमानामा अवस्थित साउदी शहर हो । जेद्धाबाट भने यो ७-८ सय कि.मी. मात्र टाढा छ ।
काठमाडौबाट दलाल राजु बि.क.ले
गंगाको उद्धारमा सघाउनु त कता कता उल्टो बिरामी गंगालाई धम्क्याउने र
तर्साउने गर्दो रहेछन । गंगाको जिउज्यान सांच्चै नै ठूलो जोखिममा छ । यसैले
म नेपाली राजदूतावास लगायत साउदी अरबमा रहनुभएका सबै संघ संस्था लगायतका
नेपाली दाजूभाईहरू र नेपालमा रहनुभएका सरोकारवाला सबैलाई गंगाको उद्धारका
लागि सक्दो पहल गरिदिनुहुन हार्दिक अपिल गर्दछु । साथै गंगालाई यो अवस्थामा
पुर्याउने सबै दलालहरूलाई पनि कानूनी सजाय दिलाउन आग्रह गर्दछु ।
नेपालमा आश्यान, राजु र जिते जस्ता दलालहरू हांसिखुशी रहने यता अरबमा
गंगाहरू दुखमा रोइरहने नियतिको अन्त्य खोजिनुपनि निकै जरूरी ठान्दछु ।
(अपिलकर्ता /लेखिका एनआरएनए साउदी अरब की सल्लाहकार हुनुहुन्छ ।)
http://www.nrnaksa.org
